Единицата за недозволена трговија со дрога и оружје при Секторот за внатрешни работи Скопје, поднесе кривична пријава до Основно јавно обвинителство–Скопје против Б.К.(30) од Скопје поради постоење основи на сомнение дека сторил две кривични дела „недозволено изработување, држење и тргување со оружје или распрскувачки материи“ и „неовластено производство и пуштање во промет наркотични дроги, психотропни супстанции и прекурзори“ предвидени и казниви по член 396 и 215 од Кривичниот законик на РСМ.
Имено, на 09.10.2019 година во 01,30 часот од страна на полициски службеници од СВР Скопје на булеварот “Крсте Мисирков“ во близина на трговскиот центар Мавровка било сопрено патничко возило управувано од Ф.Г., а како совозач бил Б.К. кај кого при преглед била пронајдена марихуана и со потврда за привремено одземени предмети била одземена. Истиот ден, по издадена судска наредба од Кривичен суд Скопје полициски службеници од Единицата за недозволена трговија со дрога и оружје при СВР Скопје, извршиле претрес на домот на пријавениот во Скопје. При претресот во подрумските простории пронајдени биле: пиштол марка „P.Beretta - Mod 950 B - Cal. 6.35“ со една празна рамка за истиот, револвер со натпис „ZBrno“ модел Grand, шест куршуми кратко зрно, 15 куршуми нн марка и калибар, 322 куршуми долго зрно и марихуана. Б.К. е приведен и од страна на судија на претходна постпака му е одредена мерка притвор.
