Поранешниот претседател на Фудбалската федерација на Македонија, Илчо Ѓорѓиоски, е приведен во рамки на истрага што ја спроведува Финансиската полиција, а која опфаќа вкупно 16 лица и три компании, како што пренесуваат извори од Финансиската полиција.
Според информациите, Финансиската полиција реализира координирана акција насочена кон повеќе физички и правни лица, за кои постојат сомневања поврзани со предметот што се истражува.
Неофицијално, при претрес во домот на Ѓорѓиоски биле пронајдени парични средства во готовина. Засега не се соопштуваат детали за износот, ниту за нивната евентуална поврзаност со истрагата.
Од надлежните институции сè уште нема официјално соопштение за природата на случајот и за евентуалните кривични дела што се предмет на постапката. Се очекува во текот на денот Финансиската полиција, Министерството за внатрешни работи и Јавното обвинителство да излезат со повеќе информации.
Илчо Ѓорѓиоски беше претседател на Фудбалската федерација на Македонија од 2012 до 2018 година.
Според досегашните информации, истрагата е во тек и се преземаат дополнителни мерки за целосно расчистување на случајот.
