Приведени 13 возачи поради безобѕирно возење, меѓу нив и тројца малолетници

Во текот на изминатите 24 часа, полициските службеници низ државата лишиле од слобода 13 возачи поради безобѕирно управување со моторни возила и сторени тешки сообраќајни прекршоци.

— реклама —

Од Министерството за внатрешни работи информираат дека 11 од приведените управувале возила без возачка дозвола, а меѓу нив имало и тројца малолетници. Четири лица биле приведени во Скопје, три во Гостивар, од кои двајца се малолетници, а по едно лице во Тетово, Прилеп, Дебар и Кочани. Малолетникот во Кочани бил затекнат како се движи во спротивен правец по еднонасочна улица.

— реклама —

Во Скопје било приведено и едно лице кое управувало возило под дејство на алкохол, додека во Гостивар полициски службеници лишиле од слобода возач кој управувал и покрај тоа што имал активна забрана за управување со моторно возило.

— реклама —

По целосното документирање на случаите, против сите лица ќе бидат поднесени соодветни кривични пријави.

— реклама —

Од МВР повторно апелираат до сите учесници во сообраќајот да ги почитуваат сообраќајните правила и прописи, да не управуваат возило без возачка дозвола, за време на изречена забрана за управување или под дејство на алкохол, со цел да придонесат за поголема безбедност на патиштата.