ВМРО-ДПМНЕ реагираше на обвинувањата од опозициската СДСМ, тврдејќи дека проблемот со исправноста на водата за пиење во Гостивар не е нов, туку е последица на, како што наведуваат, долгогодишна негрижа за време на владеењето на СДСМ, ДУИ и Арбен Таравари.
Од партијата велат дека претседателот на СДСМ, Венко Филипче, нема основа да држи лекции за јавното здравје, бидејќи, според нив, токму во периодот кога тој бил министер за здравство биле регистрирани сериозни проблеми со квалитетот на водата.
ВМРО-ДПМНЕ наведува дека лабораториски анализи од ноември 2020 година покажале зголемено присуство на колиформни бактерии и дека тогаш било констатирано оти водата не е безбедна за пиење. Според партијата, исти или слични наоди биле утврдени и во февруари и март 2021 година.
Во реакцијата се посочува дека проблемите продолжиле и во наредните години. Според ВМРО-ДПМНЕ, во јули 2022 година, како и во јуни и август 2023 година, анализите повторно покажале дека водата не ги исполнува критериумите за безбедност поради зголемено присуство на бактерии.
Од партијата тврдат дека надлежните институции во тој период не презеле соодветни мерки, иако, како што наведуваат, постоеле извештаи кои укажувале на неисправност на водата.
„Граѓаните на Гостивар не заслужуваат политичко префрлање на вината, туку одговори и одговорност. Сè поочигледно е дека денешниот проблем е резултат на години негрижа и неработење на локалната и централната власт во периодот кога со нив раководеа СДСМ, ДУИ и Таравари“, се наведува во реакцијата.
Од ВМРО-ДПМНЕ додаваат дека Филипче, пред да ја критикува актуелната власт, треба да даде одговор за сопственото работење како министер за здравство и за постапувањето на институциите во периодот кога СДСМ беше на власт.
