Патувањата за продолжениот викенд, во комбинација со вообичаената смена на туристите на крајот од август, се очекува да предизвикаат значително зголемување на сообраќајот на патиштата и подолги задржувања на граничните премини со Грција.
Во петок и сабота се очекува најголем број возила да се движат кон јужниот сосед. Неработните денови ќе ги искористат голем број граѓани за патување кон грчките туристички места, додека дополнителен сообраќаен притисок ќе создаваат и странските туристи кои во овој период го започнуваат или го завршуваат одморот.
Најголема оптовареност се очекува на Богородица – Евзони, главната патна врска кон Солун, Халкидики и Олимпискиот регион. Засилениот сообраќај би можел да започне уште во петок, а високата фреквенција се очекува да продолжи и во текот на саботата.
Во недела ситуацијата би можела да се промени, бидејќи поголем дел од возилата ќе се движат од Грција кон Македонија. Тоа може да доведе до формирање колони и подолги задржувања на грчката страна при влез во Македонија. Зголемен сообраќај се очекува и подоцна на Табановце, особено кај патниците кои продолжуваат кон Србија.
За оние кои сакаат да го избегнат најфреквентниот премин Богородица, како можни алтернативи се издвојуваат Дојран – Дојрани и Меџитлија – Ники.
Дојран – Дојрани може да биде практичен избор за патниците што се упатуваат кон Солун, Аспровалта и Халкидики. Меџитлија – Ники, пак, е посоодветен за оние кои патуваат кон западна Грција, вклучително и кон Јонското Море, Лефкада и Парга.
На возачите им се препорачува пред патувањето да ги проверат актуелните состојби на граничните премини преку веб-камерите на ЈП „Државни патишта“ и АМСМ. Доколку имаат можност, патниците треба да го приспособат времето на поаѓање и да ги избегнуваат периодите со најголема фреквенција.
