Сингапурскиот универзитет за технологија и дизајн предвидува дека епидемијата на корона вирус во Македонија ќе заврши на 16 јуни оваа година, објави „360 степени“.
Во анализата спроведена во глобални рамки, нивната иновативна Лабораторија за проучување податоци проектира дека ковид-19 на светско ниво ќе биде актуелен најдоцна до 1 декември 2020 година, по што се очекува да стивне.
На веб-страницата на Универзитетот се прикажани проекции за голем број држави. Тие се базирани на математички модел наречен SIR (сомнителен-заразен-закрепнат) кој, според истражувачите, дава континуирана и предвидлива насока за развојот на заразата.
Според податоците за Македонија, се предвидува 97-процентно завршување на епидемијата на 13 мај, 99-отстотно на 22 мај, а во целост, ковид-19 на територијата на нашата држава ќе го снема до 16 јуни.
Кај нашите соседи и во земјите од регионот, од коронавирусот најбрзо ќе се ослободи Хрватска, за која предвидениот краен рок е еден ден пред Македонија – 15 јуни. Во Србија ќе трае до 23 август, а во Грција до 11 јули. Според ова сценарио, најдолго со ковид-19 ќе се бори Албанија, каде што како датум кога ќе заврши заразата е посочен 7 октомври.
фото: Архива
