Проф. Радица Таскова, професорка по македонски јазик и литература од Кратово, ја објави својата втора книга „Кога срцата пишуваат заедно“, дело создадено со желба преку пишаниот збор да ги поврзе луѓето и да придонесе таму каде што е најпотребно.
Во книгата се застапени автори од повеќе градови од Македонија, но и од Србија, Хрватска, Босна и Херцеговина и Црна Гора. Особена радост за авторката претставува учеството на нејзините ученици, кои во книгата се претставени со своја поезија. Меѓу учесниците е и авторката Љубица Смиланска од Охрид.
„Кога срцата пишуваат заедно“ носи различни животни приказни и поетски гласови, но ги обединува една заедничка порака – дека човечноста, солидарноста и добрината не познаваат граници. Секој од авторите, како што истакнува Таскова, во книгата оставил дел од себе, своите емоции, болки, надежи и љубов.
Проф. Радица Таскова е авторка и на книгата „Лузни што зборуваат“. Рецензијата за нејзиното прво дело ја потпишал проф. д-р Венко Андоновски, додека рецензијата и лекторирањето ги направила Марија Лозаноска.
Покрај авторската работа, Таскова е активна и како книжевен рецензент, уредник и коректор. Соработува со автори и издавачки куќи, работи на ракописи и учествува во уредувањето на книги од други автори.
За неа, книжевноста не претставува само професија, туку и животна определба преку која им помага на новите и на афирмираните автори нивниот збор да стигне до читателите во најдобра можна форма.
Книгата „Кога срцата пишуваат заедно“ е објавена од издавачката куќа „Ирис“ од Струга. Заинтересираните читатели од Охрид и од другите места можат да ја набават директно кај авторката.
Таскова упатува благодарност до сите автори кои се дел од оваа заедничка приказна, нагласувајќи дека книгата не ја доживува само како свое дело, туку како книга на 90 срца кои решиле да пишуваат заедно.
