Професор Атанасовски: Коските што Бугарија ги зеде не се на Самуил, тој никогаш не бил во Софија

Професорот Александар Атанасовски од УКИМ, специјалист за средниот век, тврди дека посмртните останки што Грција ѝ ги предаде на Бугарија и кои се претставуваат како останки на цар Самуил не се докажани како негови. Во интервју за Бугарското национално радио тој остро ја оспори тезата дека со нивното пренесување Самуил „се враќа“ во Бугарија и порача дека не постои доказ оти пронајдените коски навистина му припаѓаат на средновековниот владетел.

„Па, тој никогаш не бил во Бугарија, зошто да се прибира, кога е земен тој од Бугарија? Вака излегува дека ние сме го украле Самуил од Бугарија и сме го донеле во Македонија, а тој е роден во Македонија, тука умрел и тука е погребан. Не знам која е новината да се прибира тој во Бугарија?! Тоа е најголемата глупост“, изјави Атанасовски.

На прашањето каде точно е погребан Самуил, професорот одговори дека тоа е „прашање за Нобелова награда“, но категорично го оспори тврдењето дека четирите гроба откриени во Преспа даваат сигурен одговор.

„Едно е сигурно: не е таму каде што мислат и тие остатоци што ги зема Бугарија не се на Самуил. Прво, оние четири гроба таму, не се знае чии се, нема никаков натпис, нема никаков доказ“, рече тој.

— реклама —

Атанасовски изнесе и своја теза дека вистинските останки на Самуил можеби биле однесени во Бугарија уште во периодот 1943–1944 година. Според него, во текот на Втората светска војна биле вршени истражувања во селото Герман во Преспа, каде што биле погребани членови од семејството на Самуил, а пронајдените останки биле однесени во Софија.

Тој смета дека скелетот што сега е пренесен од Грција во Бугарија би можел да му припаѓа на свештено лице. Како еден од аргументите ја посочи положбата во која бил пронајден скелетот и начинот на кој била поставена главата на покојникот.

Атанасовски се осврна и на натписот на саркофагот во Софија – „Самуил, во Христа Бога, цар на Бугарите“.

„Тоа некој ваш го напишал, не го напишал сигурно Самуил. Не постои ни еден документ, ни еден запис каде што Самуил се нарекол ‘цар на Бугарите’“, рече професорот.

— реклама —

Според неговото толкување на историските извори, Самуил самиот никаде не се нарекува ниту македонски ниту бугарски цар, а прашањето за карактерот на неговата држава останува предмет на различни историски толкувања.

„Македонски не можеме да го наречеме, ви реков никаде не е наречен ни македонски, ни бугарски, ни било каков“, рече Атанасовски.

Тој остро го критикуваше и договорот меѓу Грција и Бугарија за пренесување на останките, оценувајќи дека станува збор за „кражба на македонските историски аргументи“.

„Самуил никогаш не бил во Софија. Што бара сега тој во Софија?“, праша Атанасовски.

— реклама —

Професорот се осврна и на работата на Заедничката македонско-бугарска комисија за историски и образовни прашања. Според него, нема потреба од нејзино постоење, а нејзината работа, како што тврди, со текот на времето била политизирана.

„За мене таа комисија е одвишок, нема потреба. Таа комисија сосема поинаку се сфати – фактички вашите политичари ја користат за да ја уценуваат Македонија да се откажеме од историјата, да се откажеме од јазикот, да се откажеме од името“, рече Атанасовски.

Тој рече и дека никој од македонската власт не му се јавувал за да влијае врз неговите историски ставови, додавајќи дека премиерот Христијан Мицкоски никогаш не разговарал со него на таа тема.

„Со мене Мицкоски не разговарал никогаш, ниту ќе разговара“, рече Атанасовски.

— реклама —

Во интервјуто беше отворено и прашањето за внесувањето на Бугарите во македонскиот Устав. Атанасовски оцени дека доколку во македонскиот Устав се внесат граѓаните со бугарско национално чувство, тогаш треба да постои реципроцитет и во однос на Македонците во Бугарија.

„Ако се впише населението со бугарско чувство, зошто Македонците во Бугарија со македонско чувство не се впишат во вашиот Устав и не им се признаат правата?“, праша Атанасовски.

Интервјуто доаѓа во момент кога останките што со децении се чуваа во Грција и му се припишуваат на цар Самуил беа официјално предадени на Бугарија и пренесени во Софија. Атанасовски, сепак, останува на ставот дека пред какво било чествување најпрво треба да се докаже кому навистина му припаѓаат коските.

„Зошто да се поклонам на коски кога уште не знам чии се?“, порача професорот.