Американската прехранбена компанија Марс Инкорпорејтед планира значително проширување на својот производствен погон во Ступино, во московскиот регион, со што до 2027 година производствениот капацитет ќе се зголеми за речиси 500 тони слатки дневно.
Според податоците објавени на страницата на руското државно тело за надзор на градежништвото, фабриката ќе добие нов производствен комплекс со површина поголема од 26.000 квадратни метри.
Во новиот погон ќе бидат поставени линии за производство и пакување чоколади и слатки, а проширувањето ќе биде изградено како дел од постојната фабрика во Ступино.
Во објектот се планирани три производни линии. Две од нив ќе произведуваат по 216 тони чоколадо дневно, додека третата ќе има капацитет од 67 тони слатки на ден.
Изградбата треба да заврши во јуни 2027 година. Инвестицијата ја реализира Марс ЛЛЦ Русија, руската подружница на американската групација, но точниот износ на вложувањето не е објавен.
Компанијата е присутна на рускиот пазар од 1991 година, кога ја основала подружницата „Мастер фудс“ и почнала продажба на производи како Ем-енд-Емс, Марс и Сникерс, како и храна за домашни миленици од брендовите Вискас и Педигри.
Првиот производствен комплекс на компанијата во Ступино бил отворен во 1995 година, а покрај него „Марс“ има производствени капацитети и во Новосибирск, како и во московскиот и улјановскиот регион.
