Во германскиот град Келн денеска е во тек голема евакуација откако во близина на реката Рајна беше пронајдена голема американска бомба од Втората светска војна, која треба да биде деактивирана.
Според германските медиуми, бомбата била откриена во средата вечерта во Рајна, во близина на Рајнпарк во населбата Дојц. Властите веднаш воспоставиле безбедносна зона со радиус од 400 метри, а жителите и деловните субјекти во тој реон добиле наредба итно да се евакуираат.
Во зоната што се евакуира се наоѓаат и студијата на германските телевизии РТЛ и НТВ. Поради тоа, информативната емисија „RTL Aktuel“ наместо од Келн ќе се емитува од студиото во Берлин.
Градските власти соопштија дека редовно ќе ја информираат јавноста за текот на евакуацијата и за активностите околу деактивирањето на бомбата.
Истовремено, ќе се објавуваат и информации за затворените сообраќајници, како и за влијанието врз жителите и сообраќајот во градот.
Надлежните посочуваат дека времетраењето на операцијата ќе зависи од тоа колку брзо ќе биде целосно испразнета опасната зона околу местото каде што е пронајдена бомбата.
