Пронајдени дрога и дигитални ваги во Пробиштип и Злетово, уапсени три лица

Три лица се лишени од слобода по полициски претреси во Пробиштип и во селото Злетово, при што биле пронајдени марихуана, грутчеста материја, семки од канабис и предмети поврзани со мерење и подготовка на дрога, соопшти Министерството за внатрешни работи.

— реклама —

На 11 октомври, полициски службеници од Отсекот за недозволена трговија со дрога и оружје при СВР Штип, заедно со екипи од полициските станици во Пробиштип, Берово, Делчево и Виница, ги лишиле од слобода М.А. (34) и К.А. (30) од Злетово, како и К.Т. (23) од Пробиштип.

— реклама —

При претрес на домот на М.А. во Злетово, извршен со судска наредба, биле пронајдени и одземени грутчеста материја и дробилка. Во домот на К.Т. во Пробиштип, исто така со судска наредба, била пронајдена марихуана.

Во домот на К.А. во Злетово, каде што претресот бил извршен со судска наредба во негово отсуство, но во присуство на неговите родители, биле пронајдени неколку пакувања со грутчеста материја, марихуана, семки од канабис, две дигитални ваги, дробилка со остатоци од марихуана и други предмети со траги од оваа супстанција.

— реклама —

Додека траел претресот, К.А. со возило пристигнал пред дворот на домот, по што бил лишен од слобода.

— реклама —

Против тројцата е поднесена кривична пријава според член 215 од Кривичниот законик. На К.А. му е определен притвор во траење од 30 дена, по одлука на судија на претходна постапка, и тој е спроведен во Казнено-поправната установа „Затвор Куманово“.