Случајот со оштетувањето на спортските реквизити и урбаната опрема во дворот на основното училиште „Васил Главинов“ во Велес е расчистен, информира Министерството за внатрешни работи.
По објавувањето на видеото на социјалните мрежи на кое се гледа како две лица оштетуваат опрема во училишниот двор, полицијата презела мерки за нивно пронаоѓање. Случајот претходно бил пријавен и поради оштетување на спортски реквизити и тартан-подлогата на ракометното игралиште.
На 18 и 19 август, полициски службеници од СВР Велес извршиле службени разговори со двајца малолетници на возраст од 15 години. Разговорите биле спроведени во присуство на нивните родители и претставник од Центарот за социјални работи Велес.
Од МВР информираат дека по целосното расчистување и документирање на случајот ќе бидат поднесени соодветни поднесоци.
