Пет лица се лишени од слобода во Велес во полициска акција во која биле пронајдени ловечко оружје, муниција и поголема количина уловен дивеч за кој било утврдено дека потекнува од незаконит лов. Меѓу приведените се четворица италијански и еден македонски државјанин.
На 2 септември во 11:20 часот, на автопатот Велес–Градско, полициски службеници од Отсекот за недозволена трговија со дрога и оружје при СВР Велес го лишиле од слобода 60-годишниот Л.Б. од Италија, кој имал привремен престој во Велес.
При преглед на патничко возило „ауди“ со албански национални ознаки, кое го управувал, биле пронајдени и одземени 207 ловечки патрони за кои не поседувал соодветна документација.
За случајот бил известен јавен обвинител, како и инспектор за странци. По документирањето на настанот, против Л.Б. ќе биде поднесена пријава за кривично дело „неовластено изработување, држење, посредување и тргување со оружје или распрскувачки материи“ по член 396 од Кривичниот законик.
Подоцна истиот ден, во 18:50 часот, полицијата ги лишила од слобода и 58-годишниот Т.Р., 72-годишниот З.Д. и 74-годишниот А.А., сите државјани на Италија, како и 62-годишниот М.И. од Скопје.
При претрес во објектот во Велес во кој престојувале италијанските државјани, извршен со судска наредба од Основниот суд Велес, биле пронајдени и одземени ловечко оружје, ловечки патрони, поголема количина уловен дивеч, пари, документација и други предмети. Во објектот бил затекнат и М.И., кој работел како домар.
За пронајдениот улов бил известен претставник на ловечкото друштво „Руен“ од Велес. По извршените проверки било констатирано дека одземениот улов потекнува од кривично дело „незаконит лов“, казниво по член 228 од Кривичниот законик.
Л.Б., Т.Р. и М.И. биле задржани во полициска станица. За случајот бил известен јавен обвинител, а по целосното расчистување и документирање на настанот ќе бидат поднесени соодветни пријави.
