Пронајдено телото на хрватскиот морнар кој исчезна при потонувањето на нафтена платформа во Габон

По повеќедневна потрага, пронајдено и идентификувано е телото на хрватскиот морнар Дамир Параќ од Риека, кој исчезна на 24 октомври при потонувањето на нафтената платформа „Проспектор 5“ во близина на брегот на Габон. Неговата смрт ја потврдиле властите во Габон, а веста ја објавила државната новинска агенција АГП.

— реклама —

Параќ е еден од четворицата загинати работници чии тела биле пронајдени во потонатата платформа и идентификувани со помош на судски лекар. Телата биле извлечени од морето во периодот од 29 до 31 октомври, под надзор на надлежното обвинителство. Семејствата биле известени пред официјалното објавување на информацијата.

Идентификувани се и тројца државјани на Габон – Ирчаде Адио Акиночо, Роберт Мусаву и Јан Улрих Нкоруна Огове. Габонските власти отвориле истрага за утврдување на причините за несреќата и евентуалната одговорност.

— реклама —

Нафтената платформа „Проспектор 5“, со која управувала компанијата „Бор Дрилинг“, потонала на 24 октомври на нафтеното поле Дусафу Марин, во близина на Мајумба, на југозападот на Габон. Во моментот на несреќата на платформата имало 115 работници. Од нив, 110 биле спасени, додека пет лица се воделе како исчезнати.

— реклама —

Според првичните информации, за време на подготовките за дупчење една од потпорните ногарки на платформата пропаднала во морското дно, по што конструкцијата ја изгубила стабилноста, се навалила и потонала. Точната причина за несреќата сè уште се утврдува.

Во потрагата учествувале хеликоптери, бродови, нуркачи и подводни уреди, а на спасувачките служби од Габон им се приклучиле и силите на соседната Република Конго. Хрватското Министерство за надворешни и европски работи претходно го потврдило исчезнувањето на својот државјанин и соопштило дека хрватската амбасада во Мароко, надлежна и за Габон, е во контакт со неговото семејство.

— реклама —