Државната комисија за спречување на корупцијата (ДКСК) отвори предмет за можен судир на интереси поврзан со прославата на 35-годишнината од независноста на Македонија. Од Комисијата за ТВ 24 велат дека постапката е отворена по допрен глас и по сопствена иницијатива, а се однесува на лице кое било член на Комисијата за избор на програмата и подоцна се појавило како изведувач во рамките на прославата.
Претседателот на ДКСК, Адем Чучуљ, потврди дека Комисијата го разгледува случајот во рамките на своите законски надлежности.
– Од аспект на своите законски надлежности и како превентивно тело го следиме случајот. Конкретен предмет немаме отворено, имаме отворено само предмет во делот на судир на интереси на едно од лицата што се спомнуваше дека бил член на Комисијата и дека учествувал како изведувач, изјави Чучуљ.
Станува збор за Николче Мицевски, претседател на Комисијата за евалуација, кој подоцна е наведен и како автор на оркестрациите за настапот на Хосе Карерас во програмата за прославата.
Од ДКСК посочуваат дека ги следат реакциите во јавноста и барањата за транспарентност околу трошењето на средствата, а Чучуљ ги повика надлежните истражни органи да постапат доколку утврдат сомнежи за незаконитости.
– Ние го разгледуваме случајот, ги следиме и натписите и реакциите во јавноста. Веруваме дека и другите надлежни органи, пред сè истражните органи, го следат случајот и доколку ценат дека постојат одредени незаконитости, ќе отворат постапки во рамките на нивните надлежности, изјави Чучуљ.
Од СДСМ повторно побараа Јавното обвинителство да отвори истрага за финансирањето и трошењето на средствата за прославата. Кети Штерјова од партијата побара да се обезбеди целокупната документација и да се утврди текот на парите и начинот на кој биле донесени одлуките.
Од ВМРО-ДПМНЕ возвратија со обвинувања кон СДСМ и ДУИ, тврдејќи дека тие со години биле заштитени од, како што наведоа, „свои“ судии и обвинители.
Според податоците што ги објави Владата, прославата чинела 5,5 милиони евра средства од Државната лотарија и дополнителни 650 илјади евра од општествено одговорни компании. За начинот на трошење на средствата и поединечните трошоци за настапите досега нема објавени целосни податоци.
