Први консултации на Јотова со партиите за службена влада

Претседателката на Бугарија Илијана Јотова ќе ги одржи првите консултации со претставниците на парламентарните групи во 51-вото Народно собрание во рамките на процедурата за назначување службен претседател на владата, соопшти прес-службата на шефицата на бугарската држава.

— реклама —

Јотова денеска ќе разговара со претставници на ГЕРБ-СДС, а потоа и на „Продолжуваме со промената – Демократска Бугарија“.

— реклама —

Минатата недела Јотова се сретна со сите потенцијални службени премиери наведени во Уставот, а петмина од нив изразија подготвеност да ја преземат функцијата – заменик-гувернерот на Бугарската народна банка (БНБ) Андреј Ѓуров, заменик-омбудсманот Марија Филипова, претседателот на Националниот завод за ревизија Димитар Главчев, како и заменик-претседателите на заводот за ревизија Маргарита Николова и Силвија Кадрева.

– Мојата идеја е следниот службен премиер да одговори на очекувањата на бугарските граѓани, изјави Илијана Јотова во неделата.

— реклама —

Таа додаде дека ќе го објави назначувањето на службен претседател на владата откако ќе одржи консултации со партиите застапени во парламентот. Изборот на следниот службен претседател на владата е избор на Народното собрание, бидејќи тие ги изгласаа сите овие промени во Уставот како функционери кои треба да ја преземат оваа функција, како и процедурата и правилата според кои тоа треба да се случува, потсети Јотова.

Според промените во Уставот од 2023 година, по консултации со парламентарните групи и на предлог на кандидатот за службен претседател на владата, претседателот назначува службена влада и закажува избори во рок од два месеци. По промените, двапати се спроведени слични консултации – во април и август 2024 година. За разлика од сега, тогаш консултациите беа во еден ден со сите партии истовремено, пренесе БТА.