Првиот ривал на Вимблдон со голем комплимент: Ѓоковиќ е најголемиот на сите времиња

Кинескиот тенисер Јибинг Ву со големи пофалби зборуваше за Новак Ѓоковиќ во пресрет на нивниот дуел во првото коло на Вимблдон, оценувајќи го српскиот ас како најдобар тенисер во историјата.

За разлика од повеќето тенисери, кои не би биле воодушевени доколку на ждрепката го добијат Ѓоковиќ за противник, Ву призна дека бил пресреќен кога видел дека токму против седумкратниот шампион ќе го започне настапот на најпрестижниот тениски турнир.

— реклама —

„Бев пресреќен кога ја видов ждрепката. Не можев да поверувам. Да се игра против Ѓоковиќ на Централниот терен на Вимблдон е сон на многу тенисери, па и мој. За мене тој е најголемиот на сите времиња и едвај го чекам мечот“, изјави Ву за официјалната страница на АТП.

Ова ќе биде прв официјален меѓусебен дуел меѓу двајцата тенисери. За Ву, пак, ова ќе биде само втор настап на главниот терен на еден гренд-слем турнир, откако во 2022 година на САД Опен играше против Данил Медведев.

— реклама —

Кинескиот тенисер истакна дека Ѓоковиќ е негов идол и еден од најкомплетните играчи во историјата на тенисот.

„Можноста да играм на Централниот терен против човек кој постигнал толку многу во кариерата и животот е неверојатна. Тој е пример за сите тенисери. За мене е еден од најкомплетните играчи во историјата и мој идол“, рече Ву.

— реклама —

Тој додаде дека е свесен оти можеби нема да има уште многу шанси да игра против српскиот тенисер.

„Блиску е до крајот на кариерата и нема да има многу можности повторно да играм против него. Затоа бев толку среќен кога ја видов ждрепката. Ќе дадам сè од себе и ќе се обидам максимално да уживам во ова искуство“, истакна Ву.

Иако никогаш досега не играле официјален натпревар, Ву откри дека пред осум години имал можност да тренира со Ѓоковиќ во Монте Карло.

„Трениравме заедно за време на подготовките за сезоната. Интензитетот со кој работеше беше неверојатен и многу ми помогна во развојот како млад играч. Секогаш беше многу љубезен кон мене, а знае дури и неколку кинески зборови. Навистина е одличен човек“, заклучи кинескиот тенисер.