Откако Државната изборна комисија денеска ќе ги објави конечните изборни резултати, Стево Пендаровски треба да добие уверение дека е избран за шеф на државата.
Утре, пак, Пендаровски ќе биде инаугуриран на седница во Собранието, на која ќе даде свечена изјава пред народните избраници, членовите на Владата, верските лидери, првите луѓе на армијата, дипломатскиот кор и гости од странство.
Откако официјално ќе почне неговиот претседателски мандат, првата посета што ќе ја оствари Пендаровски ќе биде на соседно Косово. Пендаровски во предизборието рече дека прва земја која ќе ја посети, доколку биде избран за претседател, ќе биде Брисел.
„Не сакам однапред да се изјаснувам, но или Брисел или некој од соседите оти добрата соработка треба да почне од првиот ред соседи”, рече Пендаровски во предизборниот период.
Досега, потврда за присуство на инаугурацијата на Пендаровски пристигнала од бугарскиот претседател Румен Радев, од албанскиот претседател Илир Мета и од косовскиот претседател Хашим Тачи.
Исто така, присутни ќе бидат и заменик премиерот на Турција и делегација од Словенија, со тоа што можно е нивната делегација ќе ја предводи лично претседателот Борут Пахор.
