Шеесетгодишен жител на тетовското село Боговиње е лишен од слобода откако, според МВР, пукал на семејна веселба, при што еден од куршумите оштетил покрив на куќа во селото Синичане.
Од Министерството за внатрешни работи информираат дека на 6 август полициски службеници од СВР Тетово го привеле Т.С. (60) од село Боговиње, поради сомнение дека претходната вечер, околу 23 часот, употребил огнено оружје за време на семејна веселба.
Еден од испуканите куршуми го оштетил покривот на куќа сопственост на 66-годишниот Б.Л. од село Синичане.
По добиена судска наредба, бил извршен претрес во домот на осомничениот, при што во дворот биле пронајдени три чаури од калибар 9 милиметри и две чаури од гасен пиштол.
Во рамки на истрагата бил извршен претрес и во домот на Ф.М. (50) од Боговиње, каде во дворот биле пронајдени чаури од гасен пиштол.
Од МВР соопштуваат дека по целосно расчистување и документирање на случајот ќе биде поднесена соодветна пријава.
