Заврши повеќечасовната заложничка драма во германскиот град Дортмунд, откако 51-годишен маж, за кого се верува дека е државјанин на Србија, утрово им се предаде на полициските сили.
Според германските медиуми, осомничениот во вторникот пукал кон полицаец, а потоа се забарикадирал во својот стан заедно со своите три деца.
Полицијата соопшти дека околу 3:30 часот по полноќ мажот доброволно излегол од зградата, по што бил уапсен без да пружи отпор.
Трите деца кои се наоѓале во станот не се повредени.
Полицаецот кој бил погоден во инцидентот поминал со полесни повреди благодарение на панцирот што го носел.
Драмата започнала откако сопругата на осомничениот повикала полиција и побарала помош. Кога полициските службеници пристигнале во станбено-деловна зграда во населбата Хехстен во Дортмунд, мажот наводно отворил оган кон нив, а потоа се затворил во станот со децата.
На местото биле испратени и специјални полициски единици, кои со часови преговарале со осомничениот.
Според полицијата, во ниту еден момент не постоела опасност за случајните минувачи.
Германскиот весник „Билд“ објави дека осомничениот претходно предизвикал инцидент во ресторан во Дортмунд, каде наводно им се заканувал на гостите и употребил бибер-спреј, по што избегал со автомобил.
Според истиот извор, за време на полициската потера испукал куршум низ прозорецот од возилото и погодил полицаец.
Овие информации засега не се официјално потврдени од германската полиција, која продолжува со истрагата за околностите на случајот.
