Путин: Има шанси за мировен договор меѓу Русија и Украина

Рускиот претседател Владимир Путин оцени дека постои можност за постигнување мировен договор со Украина и ставање крај на војната. Путин ова го изјави денеска на Источниот економски форум во Владивосток, при што нагласи дека главната одговорност за постигнување решение е на Русија и Украина.

— реклама —

„Проблемот треба да биде решен од државите кои се во конфликтот – Русија и Украина. Тоа е вистинскиот начин. Благодарни сме им на сите кои се обидуваат да придонесат за постигнување договор. Има ли шанси? Според мене, да, има“, рече Путин.

— реклама —

Тој додаде дека повеќе држави, меѓу кои и САД и Кина, се подготвени да помогнат во постигнувањето и спроведувањето на евентуален мировен договор.

Путин истовремено оцени дека одредени неодамнешни потези на Украина ги отежнуваат изгледите за директни мировни преговори. Тој ги обвини украинските власти за „државен тероризам“ поради напади врз цивилни пловила и предупредувањата поврзани со безбедноста на цивилниот воздушен сообраќај во рускиот воздушен простор.

— реклама —

Рускиот претседател потврди и дека контактите меѓу Москва и Киев продолжуваат, но рече дека најголем дел од нив се одвиваат преку разузнавачки канали.

Од украинска страна, министерот за надворешни работи Андриј Сибиха оцени дека мировните напори би можеле да добијат „нова динамика“, со обновување на активната политичка и дипломатска ангажираност во повеќе светски престолнини.