Путин ја прошири својата безбедносна служба: Кремљ ги засилува мерките за заштита

Рускиот претседател Владимир Путин донесе одлука за ново проширување на централната управа на Федералната служба за обезбедување (ФСО), која е задолжена за неговата лична безбедност и за заштитата на највисоките државни институции. Од почетокот на војната во Украина, ова е четврто зголемување на бројот на вработени во оваа служба.

— реклама —

Со новата уредба, бројот на вработени во централната управа на ФСО се зголемува од 785 на 812 лица. Одлуката стапи во сила на 1 јули и претставува прво проширување на службата во текот на календарската година од почетокот на војната.

— реклама —

Федералната служба за обезбедување е задолжена за заштита на рускиот претседател, неговото семејство, премиерот, како и на Кремљ, Државната дума и бројни претседателски резиденции. Во рамките на ФСО функционира и специјална единица што е одговорна за безбедните државни комуникации и за нуклеарниот куфер што го придружува Путин, додека друга единица се грижи исклучиво за неговото лично обезбедување.

Пред почетокот на целосната инвазија врз Украина, бројот на вработени во централната управа на ФСО не бил менуван повеќе од една деценија. Во 2022 година тој бил зголемен од 725 на 760 лица, а со последователните проширувања сега достигна 812, што претставува раст од околу 12 проценти во споредба со предвоениот период.

— реклама —

Во последните месеци, повеќе руски и западни медиуми објавија дека Кремљ дополнително ги заострил мерките за безбедност околу Путин поради стравувања од можен атентат или обид за државен удар. Според тие информации, лицата кои работат во негова близина имаат строги безбедносни протоколи, а неговите патувања се ограничени и обезбедени со засилени мерки.

— реклама —

За време на неодамнешната посета на Казахстан, според медиумските извештаи, колоната што го придружувала рускиот претседател била составена од оклопни возила, хеликоптер и специјално возило опремено со систем за електронско војување, наменет за неутрализирање на потенцијални закани.