Рускиот претседател Владимир Путин најави дека руските сили ќе ги засилат нападите врз украинската инфраструктура со цел, како што рече, да ја одвратат Украина од напади врз цели на руската територија.
„Со оглед на тоа што тие го прават тоа, мораме соодветно да одговориме. Тоа и го правиме, а ќе продолжиме да ги засилуваме ударите врз непријателската инфраструктура за да ги одвратиме од напади врз нашите цивилни објекти“, изјавил Путин на средба со припадници на руските вооружени сили, пренесуваат руските медиуми.
Тој посочил дека украинските напади предизвикуваат штета врз руската економија, но оценил дека таа брзо закрепнува.
„Секако дека се нанесува штета, но сè брзо се обновува. Нема да успеат да ни создадат сериозни проблеми“, нагласил рускиот претседател.
Путин открил и дека повеќе од 700.000 руски војници во моментов се распоредени во зоната на, како што Москва ја нарекува, „специјалната воена операција“ во Украина. Тој додаде дека руските власти подготвуваат образовни програми, медицинска рехабилитација и можности за вработување за војниците по нивното враќање од фронтот.
Истовремено признал дека руските сили не напредуваат со посакуваната брзина.
„Полека, чекор по чекор, ги враќаме нашите територии под контрола. Тоа и ќе го оствариме, во тоа никој не треба да се сомнева“, изјавил Путин.
Во меѓувреме, украинското воено воздухопловство предупреди дека постои голема веројатност Русија во следните 24 часа да лансира балистички проектили од полигонот Капустин Јар. Од оваа локација Москва и претходно лансираше балистички ракети со среден дострел од типот „Орешник“.
