Путин: На Русија ѝ се потребни пет дена за расчистување на мините околу Константиновка

Рускиот претседател Владимир Путин по средбата со американските претставници Стив Виткоф и Џаред Кушнер во Москва изјави дека на Русија ѝ се потребни пет дена за расчистување на подрачјето околу Константиновка од мини. Тој предложил организирање хуманитарна мисија во градот, слична на неодамнешната операција во украинскиот град Олешки, пренесе руската државна агенција ТАСС.

Путин изјавил дека Русија ја контролира Константиновка и дека е подготвена да ја гарантира безбедноста на хуманитарната мисија. Според него, организацијата на активностите би можела да им биде доверена на народните правобранители.

— реклама —

„На Русија ѝ се потребни пет дена за да го исчисти подрачјето околу Константиновка од мини“, пренесе ТАСС дел од неговата изјава.

Тој додал дека доколку Украина смета оти ја контролира Константиновка, треба да ја обезбеди безбедноста од своја страна. Путин истакнал и дека за Русија единствена линија на разграничување со Украина е државната граница, додавајќи дека мирот треба да биде траен.

— реклама —

Во однос на односите со Европа, рускиот претседател изјавил дека Москва никогаш не била против дијалогот, туку дека европските земји ги прекинале контактите. Тој ја отфрлил и можноста за распоредување странски војници во Украина, предупредувајќи дека тие би станале легитимна цел на руската војска.

— реклама —

Американскиот специјален пратеник Стив Виткоф, пак, оцени дека неодамнешните трилатерални разговори во Абу Даби меѓу Русија, Украина и САД поминале во позитивна атмосфера. Тој посочи дека делегациите постигнале договор за голема размена на заробеници и најави дека информациите од средбата со Путин ќе му ги пренесе на украинскиот претседател Володимир Зеленски.

— реклама —

Виткоф изрази надеж дека ќе биде договорена и следна рунда трилатерални преговори. Џаред Кушнер истакнал дека САД сакаат да разговараат за завршување на војната и за можните решенија за воспоставување мир во Украина. Тој додал дека Вашингтон започнал разговори со европските земји за безбедносната архитектура на континентот.