Путин најави одговор на украинските напади врз руските нафтени рафинерии

Рускиот претседател Владимир Путин најави дека Москва ќе одговори на украинските напади врз руските нафтени рафинерии, иако оцени дека досега не предизвикале значителна штета, пренесува агенцијата „Интерфакс“.

— реклама —

„Напаѓаат тука и таму, ништо особено сериозно. Сепак, продолжуваат“, изјави Путин.

Неговата изјава следуваше по утринскиот напад со голем број украински беспилотни летала, при кој избувнал пожар во нафтена рафинерија во руската област Рјазањ, соопшти регионалниот гувернер.

— реклама —

Ова е првиот потврден украински напад врз руски енергетски објект откако американскиот претседател Доналд Трамп во неделата објави дека Русија и Украина се договориле за енергетско примирје. Рускиот вицепремиер Александар Новак вчера изјави дека Украина ги нападнала рафинериите во областите Саратов и Рјазањ, но Киев негираше вмешаност.

— реклама —

Украинскиот претседател Володимир Зеленски, во интервју за „Фајненшл тајмс“, објавено денеска, изјави дека Украина ги прекинала нападите врз енергетските објекти во период од три дена за да ги исполни барањата на САД. Според него, нападите сега ќе продолжат бидејќи Русија и натаму ја гаѓа украинската енергетска инфраструктура.

Регионалниот гувернер Павел Малков соопшти дека штетата од нападот врз рафинеријата сè уште се проценува и дека итните служби работат на местото. Тој додаде дека при нападите било оштетено и складиште на друга локација, без да даде дополнителни детали.

Рафинеријата во Рјазањ е во сопственост на рускиот нафтен гигант „Роснефт“ и го снабдува Москва со гориво. Во изминатите месеци повеќепати била цел на напади со беспилотни летала. Објектот располага со речиси пет проценти од вкупниот руски капацитет за преработка на нафта.