Рускиот претседател Владимир Путин ѝ наложи на руската влада постојано да ги следи клучните прашања поврзани со развојот на арктичката зона на Русија и Трансарктичкиот транспортен коридор.
Според соопштението објавено на официјалната страница на Кремљ, надзорот над овие проекти ќе се спроведува преку Координацискиот центар на Владата на Русија под раководство на премиерот.
Путин истовремено нареди да се обезбедат финансиски средства за изградба на уште два сериски универзални нуклеарни мразокршачи од проектот 22220, како и повеќенаменски брод за нуклеарна технолошка поддршка. Во документот се наведува и можноста државата да обезбеди гаранции за финансирањето во периодот 2026–2027 година.
Рускиот претседател побарал и подготовка на предлози за составот на флотата потребна за снабдување на далечниот север на земјата, како и мерки за обезбедување непречено снабдување со електрична енергија во Мурманската област.
Дополнително, на компанијата Росети ѝ е наложено, заедно со надлежните институции, да обезбеди стабилно функционирање на електроенергетскиот систем во регионот и, доколку е потребно, да спроведе модернизација на енергетската инфраструктура.
Овие мерки се дел од пошироката стратегија на Москва за зајакнување на присуството и економскиот развој на Арктикот, регион кој добива сè поголемо геополитичко и економско значење.
