Руското Министерство за одбрана денеска соопшти дека Русија ќе одржи воена вежба која ќе опфати практикување употреба на тактичко нуклеарно оружје по „провокативните закани од западните претставници“, пренесува Ројтерс.
Министерството за одбрана соопшти дека вежбата е нарачана од претседателот Владимир Путин и дека со неа ќе се тестира подготвеноста на нестратешките нуклеарни сили за извршување на борбени мисии.
Воените вежби ќе опфатат вежбање на подготовка и распоредување за употреба на нестратегиско нуклеарно оружје. Ќе учествуваат ракетни формации во Јужниот воен округ и поморските сили.
„За време на вежбата ќе се спроведат голем број мерки за обука на подготовка и употреба на нестратегиско нуклеарно оружје“, соопшти Министерството за одбрана.
Русија го има најголемиот арсенал на нуклеарно оружје во светот, а вежбата има за цел да го обезбеди територијалниот интегритет и суверенитет на Русија „како одговор на провокативните изјави и заканите на одредени западни претставници против Руската Федерација“, се вели во соопштението.
