Рускиот претседател Владимир Путин денес изјави дека јавниот долг на Русија изнесува 16,4 отсто од бруто домашниот производ (БДП), нагласувајќи дека тоа е значително пониско ниво во споредба со земјите од еврозоната.
Зборувајќи на пленарната сесија на Меѓународниот економски форум во Санкт Петербург (SPIEF), Путин истакна дека руската економија, и покрај забавувањето на растот, ја задржува макроекономската стабилност и дека од следната година се очекува враќање на поодржливи стапки на економски развој.
Тој наведе дека бруто домашниот производ на Русија во април пораснал за 1,3 отсто на годишно ниво, додека инфлацијата продолжува да забавува и би можела годинава да се намали на околу 5,2 отсто.
Според него, буџетскиот дефицит моментално изнесува 2,6 отсто од БДП и останува понизок отколку во повеќето развиени економии. Путин нагласи дека инвестициите се клучен показател за економската ефикасност и дека Русија мора да продолжи со развој на сопствени технологии, дигитални платформи и системи базирани на вештачка интелигенција.
Тој оцени дека „трката за суверенитет“ се интензивира, додека Западот, според него, го изгубил интересот за трговските правила кога почнал да ја губи конкурентноста.
Путин додаде дека санкциите и замрзнувањето на руските девизни резерви влијаеле врз глобалните валути и го поттикнале создавањето нови финансиски и трговски механизми, при што светската економија, како што рече, се движи кон мултиполарен модел.
Тој истакна и дека земјите од БРИКС сега придонесуваат повеќе за светскиот економски раст отколку Групата седум најразвиени земји (Г7), додавајќи дека нивното значење ќе продолжи да расте.
Меѓународниот економски форум во Санкт Петербург се одржува од 3 до 6 јуни.
