Русија денеска префрли нуклеарно оружје во складишта во Белорусија и прикажа дел од своите стратешки нуклеарни сили, во услови на зголемени тензии со европските членки на НАТО поради војната во Украина и активностите со беспилотни летала над Балтикот.
Рускиот претседател Владимир Путин изјави дека употребата на нуклеарно оружје е „крајна мерка“, но нагласи дека нуклеарната тријада – копнени, поморски и воздушни сили – останува клучен гарант за рускиот суверенитет и стратешко одвраќање.
Москва спроведува едни од најголемите нуклеарни вежби во последните години, во кои учествуваат околу 64.000 луѓе. Маневрите траат три дена и се одржуваат на територијата на Русија и Белорусија.
Во вежбите учествуваат стратешките ракетни сили, Северната и Пацифичката флота, далекусежната авијација, како и единици од Ленинградскиот и Централниот воен округ.
Русија прикажа нуклеарна подморница од класата „Бореј“, противподморнички авион Ил-38, ловец МиГ-31, вооружен со хиперсонична ракета „Кинжал“, како и интерконтинентални балистички ракети RS-24 „Јарс“.
Според руското Министерство за одбрана, ракетна единица во Белорусија вежба прием и товарење специјална муниција за мобилниот тактички ракетен систем „Искандер-М“.
Вежбите се одржуваат во момент кога Кремљ тврди дека Русија се наоѓа во „егзистенцијална борба“ со Западот поради Украина.
Во меѓувреме, Москва ги обвини балтичките земји дека ѝ дозволуваат на Украина да користи нивен воздушен простор за напади врз северна Русија, што НАТО го негира. Тензиите дополнително се зголемија по изјавата на литванскиот министер за надворешни работи, Кестутис Будрис, кој рече дека НАТО мора да покаже дека може да продре во руската енклава Калининград.
