Путин повторно се пофали: Руската економија и натаму е меѓу најсилните во светот

Рускиот претседател Владимир Путин изјави дека Русија и натаму се наоѓа на четвртото место во светот според бруто-домашниот производ (БДП), пресметан според паритетот на куповната моќ, веднаш зад Кина, Соединетите Американски Држави и Индија.

— реклама —

„Русија и понатаму според паритетот на куповната моќ е на четвртото место во светот, по Кина, САД и Индија. Четврта. И прва во Европа“, рече Путин на состанок со пратениците во Државната дума.

Осврнувајќи се на економскиот раст, рускиот претседател оцени дека земјата има повисока стапка на раст од Европската Унија, но предупреди дека постојат ризици поврзани со инфлацијата.

— реклама —

„Секако дека би сакале економијата да расте уште побрзо. Но, постојат ризици од раст на инфлацијата и последиците што таа ги носи“, изјави Путин.

— реклама —

Тој нагласи дека една од најголемите предности на Русија е отпорноста на нејзиниот економски и финансиски систем.

„Токму таа отпорност ни овозможува да решаваме различни прашања, да работиме на развојот на индустријата, вклучително и одбранбениот сектор, како и да ги решаваме социјалните прашања“, рече рускиот лидер.

Путин овие оценки ги изнесе по последната пленарна седница на Државната дума во нејзиниот осми состав, при што им се заблагодари на пратениците за, како што рече, ефикасната работа, зајакнувањето на државниот суверенитет и заштитата на националните интереси на Русија.