Германија го отфрли предлогот на рускиот претседател Владимир Путин поранешниот германски канцелар Герхард Шредер да посредува во можни преговори меѓу Русија и Европската Унија за мировен договор во Украина.
Претседателот на Европскиот совет, Антонио Кошта, неодамна изјави дека постои „потенцијал“ Европската Унија да разговара со Русија за идната безбедносна архитектура во Европа. Путин потоа порача дека, доколку дојде до такви разговори, за него најпосакуван посредник би бил Шредер.
Но, германски претставник за Ројтерс изјавил дека понудата не е веродостојна, бидејќи Русија не променила ниту еден од своите услови. Според него, првиот тест за сериозноста на Москва би бил дали е подготвена да го продолжи тридневното примирје.
Истиот извор оценил дека Путин во повеќе наврати изнесувал „лажни понуди“ со цел да го подели западниот сојуз.
Герхард Шредер со години е мета на критики во Германија поради блиските односи со Путин и неговата работа во руските енергетски компании. По заминувањето од функцијата канцелар во 2005 година, тој стана дел од контроверзниот германско-руски проект за гасоводот „Северен тек“.
Портпаролот на германската влада во петокот изјави дека Берлин не гледа знаци дека Москва е навистина заинтересирана за сериозни преговори, нагласувајќи дека секој евентуален дијалог со Русија мора да биде координиран со земјите членки на Европската Унија и со Украина.
