Путин: „Русија се бори за сегашноста и иднината, силна е и ќе остане силна“

Рускиот претседател Владимир Путин денеска порача дека придонесот на секој граѓанин е важен за заедничкиот успех на земјата, нагласувајќи дека Русија, според него, во моментов се бори за својата сегашност и иднина.

„За успешен и самоуверен развој на земјата неопходен е придонесот на сите – волонтерите, вработените во невладините организации и социјалните служби, раководителите, инженерите, работниците и, секако, претприемачите“, рече Путин на форумот „Силни идеи за новото време“ во Нижни Новгород.

— реклама —

Тој посочи дека Русија во моментов се бори за сегашноста и иднината и повика искуството на војниците, стекнато во текот на Втората светска војна, да биде земено предвид при развојот на воените, цивилните и сродните технологии.

Путин нагласи дека во интерес на зајакнувањето на суверенитетот, Русија преку практични активности се стреми кон подобрување на благосостојбата на граѓаните.

— реклама —

„Русија е силна и ќе остане силна и во иднина“, порача рускиот претседател.

Тој истакна и дека државата и општеството имаат должност да овозможат секој ветеран од, како што руските власти го нарекуваат, „специјалната воена операција“, да продолжи да ѝ служи на татковината во економската, административната и социјалната сфера.

— реклама —

Путин додаде дека цела Русија, од Калининград до Владивосток, треба да има корист од домашниот развој. Според него, идеите и проектите на Агенцијата за стратешки иницијативи придонесуваат кон создавање нови можности за раст на регионите.

Рускиот претседател соопшти и дека ѝ наложил на Агенцијата за стратешки иницијативи да развие дополнителни поттикнувачки мерки за деловни вложувања во општествени проекти.

Путин денеска престојува во Нижни Новгород, каде што ќе посети нови објекти, фабрика за автомобили и производна линија на „Волга“, а се сретна и со гувернерот на регионот, Глеб Никитин.

Дводневниот форум „Силни идеи за новото време“, во организација на Агенцијата за стратешки иницијативи и Фондацијата „Росконгрес“, започна вчера, а завршува денеска.