(Во живо) Раичевиќ не верува дека довербата во правосудството е само 2 отсто: „Ова е еден вид мобинг врз обвинителите и судиите“

Обвинителката Лидија Раичевиќ, која се кандидира за шефица на Основното јавно обвинителство за гонење организиран криминал и корупција (ОЈО ГОКК), во поткастот „Претрес со Ландов“ изјави дека не верува дека довербата на граѓаните во правосудството изнесува само два отсто. Таа побара Министерството за правда да организира ново истражување со кое би се утврдило колкава е реалната доверба во судовите и обвинителствата.

Во разговорот, Раичевиќ го отвори прашањето врз основа на кое истражување постојано се објавува процентот од два отсто доверба во правосудството. Таа праша која организација ја спровела анкетата, кога била направена и врз каква методологија се темелела.

— реклама —

„Јас не верувам во таа анкета. И јас тврдам дека тоа не е точно. И јас сум спремна да го докажам јавно тоа“, изјави Раичевиќ.

Според неа, постојаното повторување на овој процент создава негативна слика за целото правосудство и го нарушува институционалниот кредибилитет.

— реклама —

„Ова веќе е атак којшто не може да се поднесе. Ова е еден вид на мобинг на јавните обвинители и на судиите“, рече Раичевиќ, нагласувајќи дека критиките треба да се однесуваат на конкретни пропусти, наместо со еден процент да се оценува целото правосудство.

Раичевиќ посочи дека, според информациите што ги добила, истражувањето на кое се повикуваат оние што го наведуваат процентот од два отсто било спроведено од невладина организација. Таа смета дека Министерството за правда треба да организира ново истражување за да се утврди степенот на доверба во судовите и обвинителствата.

„Министерството за правда треба да организира анкета, истражување, проект на база на којшто ќе утврди точен процент колкава доверба“, изјави таа.

— реклама —

Кандидатката за шефица на ОЈО ГОКК најави и дека е подготвена да ги истражи овие прашања и да излезе со свои наоди, потпирајќи се на податоци и искуства од судските постапки.

Како аргумент за својата позиција, таа посочи дека во текот на својата работа се среќавала со обвинети лица кои, и покрај тежината на кривичните дела за кои биле обвинети, на крајот од постапката изразувале согласност со аргументите на обвинителството.

Сепак, нејзините лични професионални искуства не претставуваат истражување на јавното мислење, а во разговорот не беа презентирани податоци од независна анкета што би го утврдила реалното ниво на доверба во правосудството.

Од лекот за Ива Михаилова до Бошкоски, „Ровер“ и криминалот – Барбов и Раичевиќ во „Претрес“