Американскиот рапер Мистикал, чие вистинско име е Мајкл Лоренс Тајлер, е осуден на 20 години затвор поради силување на жена во неговиот дом во сојузната држава Луизијана во 2022 година, објавија американските медиуми.
Музичарот во март годинава постигна договор со обвинителството и ја призна вината за силување од трет степен. Со спогодбата му беше ограничена максималната казна на 20 години затвор, со што избегна потешко обвинение за силување од прв степен, кое носи доживотна казна.
Неколку дена пред изрекувањето на пресудата, Мистикал побарал од судот да му дозволи да го повлече признанието на вината, тврдејќи дека немал доволно време целосно да ги разгледа последиците од договорот со обвинителството. Судот не го прифатил барањето.
Жртвата, која сведочела пред судот, побарала максимална казна за раперот. Таа изјавила дека во неговиот дом во Преривил била физички нападната, давена, влечена за коса и на крајот силувана.
Според локалните медиуми, Мистикал за време на рочиштето ѝ рекол на жртвата: „Ако сум ти го направил тоа, ја заслужувам максималната казна.“
Раперот се наоѓа во притвор без можност за кауција уште од неговото апсење во 2022 година.
Мистикал се прослави во текот на 1990-тите и почетокот на 2000-тите години, а најпознат е по хитот Shake Ya Ass, кој му донесе номинација за наградата Grammy Awards.
Ова не е првпат раперот да се соочи со вакви обвиненија. Во 2003 година тој призна вина за сексуален напад и беше осуден на шест години затвор. Истата година доби и две номинации за Греми наградите за албумот Tarantula и песната Bouncin' Back (Bumpin' Me Against The Wall).
