Расказот „Службен пат до Тирана“, доставен под шифра „Патникот“, е избран за најдобар на годинашниот конкурс „Живко Чинго“, соопшти Општина Охрид.
Комисијата во состав проф. д-р Димитар Пандев, како претседател, и Славе Ѓорѓо Димоски и проф. д-р Иван Џепароски, како членови, оцени дека наградениот расказ се издвојува со антрополошко-етичкиот пристап, ведрата емпатија, хуморот, оригиналноста на темата и беспрекорно чистиот јазичен израз.
На конкурсот годинава пристигнале вкупно 24 раскази.
Авторот на победничкото дело треба најдоцна до 7 август 2026 година да се јави во Одделението за култура при Општина Охрид и со четвртиот примерок од расказот да го потврди авторството.
Наградата ќе му биде врачена на традиционалната манифестација „Вечер на Живко Чинго“, која ќе се одржи на 13 август во селото Велгошти.
