„Ребалансот е признание за целосниот дебакл на економските политики на Мицкоски“, вели Филипче

Претседателот на СДСМ, Венко Филипче, на денешната прес-конференција оцени дека предложениот ребаланс на Буџетот претставува признание за, како што рече, неуспешните економски политики на Владата и најавува потежок период за граѓаните.

— реклама —

На денешната прес-конференција тој изјави дека наместо подобрување на економските показатели, ребалансот предвидува зголемување на буџетскиот дефицит и ново задолжување.

„Ребалансот на буџетот е практично признание за целокупниот дебакл на економските политики на премиерот Мицкоски. Наместо подобрување на животниот стандард, граѓаните ги очекува уште потежок период“, рече Филипче.

— реклама —

Тој посочи дека Владата ги намалила проекциите за економски раст од 3,8 на 3,5 проценти, додека, според него, инфлацијата достигнала 4,5 проценти, наместо првично планираните 2,5 проценти.

— реклама —

Филипче истакна дека со ребалансот буџетскиот дефицит се зголемува од 39,2 на 46,3 милијарди денари, односно на 4,1 процент од БДП, што, според него, ќе значи дополнително задолжување на државата.

Тој наведе дека јавниот долг достигнал 11 милијарди евра и, како што рече, за две години е зголемен за 2,5 милијарди евра, без тие средства да бидат вложени во капитални и развојни проекти.

— реклама —

Според Филипче, најголем проблем е што новите задолжувања не се користат за инвестиции, туку за покривање на тековните расходи, што, според него, е последица на лошо планирање и управување со јавните финансии.