ВМРО-ДПМНЕ преку соопштение соопшти дека ребалансот на Буџетот за 2026 година е насочен кон развој и инвестиции, оценувајќи дека дополнителните средства ќе бидат вложени во проекти што, според партијата, ќе придонесат за економски раст и подобрување на инфраструктурата.
Според партијата, со ребалансот вкупните буџетски приходи се зголемуваат за 4,575 милијарди денари, односно за 1,2 проценти, и ќе достигнат 379,5 милијарди денари. Расходите, пак, се зголемуваат за 11,6 милијарди денари или за 2,8 проценти, додека буџетскиот дефицит е проектиран на 4,1 процент од бруто-домашниот производ.
Од ВМРО-ДПМНЕ нагласуваат дека најголемиот дел од дополнителните средства ќе бидат насочени кон капитални инвестиции. Како што наведуваат, капиталните расходи се зголемуваат за 5,814 милијарди денари, што претставува раст од 14,5 проценти, додека средствата за развојни програми се зголемуваат за 4,215 милијарди денари и надминуваат 41 милијарда денари.
Во партиското соопштение се посочува дека средствата ќе се вложуваат во изградба и реконструкција на патишта, железничка инфраструктура, водоводни и канализациски системи, училишта, градинки, здравствени установи, проекти за заштита на животната средина и инвестиции во општините.
Од ВМРО-ДПМНЕ ги отфрлаат критиките на СДСМ, оценувајќи дека опозициската партија се фокусира исклучиво на висината на буџетскиот дефицит, без, како што велат, да понуди решенија за економски развој.
„Овој ребаланс ќе се оценува според реализираните проекти и инвестиции, а не според политичките прес-конференции“, наведуваат од ВМРО-ДПМНЕ.
