Пратеникот на ВМРО-ДПМНЕ, Бојан Стојаноски, преку соопштение реагираше на критиките на претседателот на СДСМ, Венко Филипче, оценувајќи дека ребалансот на Буџетот за 2026 година е доказ за стабилни јавни финансии и продолжување на развојната политика на Владата.
Според Стојаноски, ребалансот не претставува документ на криза или паника, туку финансиски документ кој ги прилагодува приходите и расходите на реалните економски движења и ги насочува средствата кон области со најголем развоен ефект.
Тој посочи дека со ребалансот вкупните приходи се зголемуваат за 4,6 милијарди денари, додека капиталните инвестиции се зголемуваат за 5,8 милијарди денари, односно за 14,5 проценти.
„Кога капиталните расходи растат за речиси шест милијарди денари, не зборуваме за празна потрошувачка, туку за патишта, железници, водоводи, канализации, здравствени установи, училишта, студентски домови, спортски објекти и проекти за животната средина“, истакна Стојаноски.
Тој нагласи дека даночните приходи во првите пет месеци од годинава се повисоки за 6,3 проценти во однос на истиот период лани, при што раст бележат приходите од ДДВ, персоналниот данок и данокот на добивка.
Стојаноски посочи и дека капиталните расходи во првите пет месеци се реализирани за 44,8 проценти повеќе во споредба со истиот период минатата година, што, според него, покажува дека проектите не остануваат само на хартија.
Тој наведе дека со ребалансот се обезбедуваат дополнителни средства за здравството, образованието, социјалната заштита, животната средина, локалната инфраструктура, земјоделството и општините, како и за проекти финансирани преку европските фондови.
Осврнувајќи се на макроекономските показатели, Стојаноски рече дека БДП во првиот квартал бележи раст од 3,1 процент, градежништвото расте за 7,2 проценти, индустриското производство за 7,6 проценти, а странските директни инвестиции се зголемени за 46,8 проценти.
„Овој ребаланс е реален, структуриран и развоен. Бројките покажуваат дека приходите растат, капиталните инвестиции се зголемуваат, а повеќе средства се насочуваат кон проекти што директно го подобруваат животот на граѓаните“, порача Стојаноски.
