Речиси 900 прекршоци со електрични тротинети за еден месец

Вкупно 871 прекршок направиле возачите на електрични тротинети во текот на септември годинава, при засилените сообраќајни контроли што ги спроведе Министерството за внатрешни работи на територијата на целата држава.

— реклама —

Според податоците на МВР, најчест прекршок е некористењето заштитен шлем, односно кацига, за што биле евидентирани 377 случаи.

— реклама —

Најмногу прекршоци биле регистрирани на подрачјето на СВР Битола, каде што биле констатирани 290. Мобилната единица за безбедност на сообраќајот на патиштата евидентирала 167 прекршоци, СВР Охрид 125, а СВР Струмица 113. Останатите случаи биле регистрирани на подрачјата на другите сектори за внатрешни работи.

Во рамки на акциските контроли биле евидентирани и осум случаи на кривичното дело „безобѕирно управување со моторно возило“, согласно член 297-а од Кривичниот законик.

— реклама —

Дополнително, полицијата констатирала и 5.362 прекршоци направени од други учесници во сообраќајот. За сите утврдени прекршоци биле преземени соодветни мерки согласно законските прописи.

Од МВР најавуваат дека ќе продолжат со засилените сообраќајни контроли и апелираат до возачите на електрични тротинети задолжително да користат заштитен шлем, да ги почитуваат сообраќајните правила и да се движат по површините наменети за нивно безбедно учество во сообраќајот.