„Редит“ ја оспорува забраната за социјални мрежи за деца под 16 години во Австралија

Австралискиот закон со кој на деца помлади од 16 години им се забранува да отвораат профили на големите социјални мрежи се соочи со првиот сериозен правен предизвик. „Редит“ пред Високиот суд на Австралија оцени дека забраната е лошо осмислена и претставува сериозно ограничување на политичката дебата, пренесува „Ројтерс“.

Компанијата, заедно со едно либертаријанско здружение, побара законот да биде прогласен за неважечки, со образложение дека ја нарушува уставно загарантираната слобода на политичко изразување. „Редит“ смета и дека прописот не треба да се однесува на неговата платформа, бидејќи, според компанијата, таа нема некои од главните обележја на социјалните мрежи, како поврзувањето преку мрежа на пријатели.

— реклама —

Законот стапи во сила кон крајот на 2025 година, со поддршка од здруженијата на родители, но и со силно противење од технолошките компании. Неговото оспорување би можело да влијае врз сличните иницијативи во други земји, меѓу кои Велика Британија и Малезија.

— реклама —

Правниот застапник на „Редит“, Пери Херцфелд, пред седумчлениот судски совет изјави дека забраната ги спречува младите да создаваат содржини и да реагираат на нив. Тој посочи дека платформите се меѓу најважните средства за комуникација во современиот свет и оцени дека државата, доколку сака да ги ограничи штетните појави, треба да ги регулира конкретните функции на социјалните мрежи, наместо целосно да го забранува пристапот.

Одбраната на „Редит“ тврди и дека законот не предвидува конкретни мерки за исклучување на малолетниците, а истовремено не опфаќа други интернет-услуги на кои се случува врсничко насилство, како платформите за видеоигри.

— реклама —

Истражувања, меѓу кои и она на австралискиот регулатор за интернет-безбедност, покажале дека мнозинството тинејџери под 16 години и натаму користат социјални мрежи и покрај забраната. Во меѓувреме, владата ја удвоила највисоката казна за непочитување на законот, која сега изнесува 99 милиони австралиски долари.

— реклама —

Австралиската влада најави дека ќе го брани законот. Нејзината застапничка Џоана Дејвидсон пред судот посочила дека децата се поранливи од возрасните на функциите на социјалните мрежи што поттикнуваат зависност, бидејќи нивниот мозок сè уште не е целосно развиен.

Министерката за комуникации Аника Велс изјави дека владата ќе ја почитува конечната одлука на судот, но ќе продолжи да го брани законот, нагласувајќи дека неговата цел е заштита на децата од штетните влијанија на интернетот.