До 18:00 часот на 20 јуни на територијата на државата се регистрирани вкупно 10 пожари на отворен простор, од кои еден е сè уште активен, а девет се целосно изгаснати.
Според информациите од надлежните служби, активен е пожарот во Општина Арачиново, каде што гори ѓубре и ниска вегетација.
Во текот на денот се изгаснати девет пожари на различни локации низ државата. Меѓу нив е пожарот кај селото Грчец во Општина Сарај, каде што горела ниска вегетација, како и пожарот во Визбегово во Општина Бутел, каде што биле зафатени дива депонија и ниска вегетација.
Изгаснати се и пожарите кај селото Волковија во Општина Брвеница, на месноста „9-ти километар“ во близина на експресниот пат Штип – Радовиш, како и кај селото Тркање во Општина Кочани.
Пожарникарите успешно интервенирале и кај селото Бучим во Општина Радовиш, кај селото Теповци во Општина Новаци, како и кај селото Пчиња во Општина Куманово, каде што покрај ниска вегетација горело и жито.
Изгаснат е и пожарот во Липковско Поле, на потегот меѓу селата Отла и Оризаре во Општина Липково, каде што биле зафатени ниска вегетација и житни посеви.
Надлежните служби и понатаму ја следат состојбата на терен и апелираат до граѓаните внимателно да се однесуваат на отворен простор со цел да се спречат нови пожари.
