До 16:00 часот на територијата на државата се регистрирани вкупно 10 пожари на отворен простор, од кои два сè уште се активни, додека осум се целосно изгаснати.
Според информациите од надлежните служби, активен е пожарот во Општина Сарај, помеѓу селата Грчец и Шишево, каде што гори ниска вегетација и мешана шума. Активен е и пожарот во Општина Радовиш, во селото Калаузлија, каде што гори старо дрво.
Во текот на денот целосно се изгаснати осум пожари. Интервенции имало во Општина Шуто Оризари, на улицата „Индира Ганди“ зад хотелот „Њу Стар“, каде што горела ниска вегетација, како и во Општина Карпош, кај Железничкиот мост кон Злокуќани.
Изгаснати се и пожарите во селото Огњанци во Општина Петровец, во селото Премка и на улицата „Методија Стефаноски“ во Кичево, како и во кумановската месност „Пармакови Ниви“.
Пожарникарите успешно интервенирале и кај селото Црвени Брегови во Општина Неготино и во селото Дорфулија во Општина Лозово, каде што гореле стрништа, трева и нискостеблеста вегетација.
Надлежните институции и понатаму апелираат до граѓаните да бидат внимателни при движење и активности на отворен простор, со цел да се спречи појава на нови пожари.
