До 18 часот денес на територијата на државата се регистрирани вкупно 13 пожари на отворен простор, од кои пет сè уште се активни, еден е ставен под контрола, а седум се целосно изгаснати.
Според надлежните служби, активни пожари има во Куманово, каде што во населбата Баново Трло гори ѓубре, а на улицата „Ѓуро Пучар – Стари“ е зафатена ниска вегетација. Активен пожар е регистриран и во скопската населба Сингелиќ, во Општина Гази Баба, каде што гори ниска вегетација и ѓубре.
Пожарникарите интервенираат и во селото Горно Лисиче, во Општина Аеродром, каде што огнот зафатил ѓубре и ниска вегетација, како и во селото Градошорци, во Општина Василево, каде што гори ниска вегетација.
Под контрола е ставен пожарот на депонија во селото Железница, во Општина Кратово.
Во текот на денот целосно се изгаснати седум пожари. Меѓу нив се пожарите во селото Арачиново, кај Старо Балдовци во Струмица, на две локации во реонот на Негорци во Општина Гевгелија, како и пожарите во близина на црквата „Свети Спас“ и на потегот Раштани – Бузалково во Велес. Изгаснат е и пожарот во селото Нараште, во Општина Теарце.
Надлежните служби и понатаму ја следат состојбата на терен и апелираат до граѓаните внимателно да се однесуваат на отворен простор со цел да се спречи појава на нови пожари.
