Рекордни 274 планинари во средата се искачиле на Монт Еверест од непалската страна, поставувајќи нов рекорд за бројот на искачувања во еден ден.
Според непалските власти, планинарите ги искористиле поволните временски услови за да стигнат до врвот висок 8.849 метри, а искачувањата започнале во три часот наутро по локално време и траеле околу 11 часа.
Со тоа е урнат претходниот рекорд од 2019 година, кога 223 планинари се искачиле на Еверест од јужната, непалска страна.
Оваа сезона речиси 500 странски планинари добиле дозвола за искачување, што исто така претставува рекорд, и покрај тоа што цената на дозволите е зголемена од 11.000 на 15.000 долари.
На социјалните мрежи деновиве се појавија снимки од долги колони планинари во таканаречената „зона на смртта“, делот од планината над 8.000 метри надморска височина, каде што кислородот е исклучително низок.
Повеќето планинари таму користат дополнителен кислород, а експертите предупредуваат дека престојот во таа зона не треба да трае подолго од 20 часа.
Сезоната ја одбележаа и нови рекорди. Непалскиот водич Ками Рита Шерпа по 32. пат се искачи на Еверест, поставувајќи нов светски рекорд, додека Лакпа Шерпа по 11. пат стигна до врвот, што е рекорд кај жените.
Меѓу планинарите кои успеале да се искачат бил и рускиот двојно ампутиран спортист Рустам Набиев, кој до врвот стигнал без протези.
Сепак, сезоната беше обележана и со неколку смртни случаи. Меѓу загинатите е и непалскиот планинар Бијај Гимире, кој починал од висинска болест, како и двајца шерпа-водичи кои загинале за време на експедициите.
