Европската слободна алијанса (ЕФА), политичко семејство во кое членува и ОМО Илинден – ПИРИН, разгледува предлог-резолуција со која се бара поголемо внимание кон, како што се наведува, репресијата врз македонското малцинство во Бугарија и официјално извинување од бугарската држава за политиките спроведувани во периодот на комунистичкиот режим.
Документот е насловен „Континуирана репресија врз македонското малцинство во Бугарија и барање за официјално извинување од Бугарија за нејзините злосторства за време на комунистичкото владеење“ и е поднесен од ОМО Илинден – ПИРИН.
Во образложението се тврди дека Македонците во Бугарија и натаму се соочуваат со негирање на нивниот идентитет, ограничување на правото на здружување и неможност за регистрација на организации кои ги застапуваат нивните интереси. Авторите на документот наведуваат дека сегашната состојба претставува продолжение на политиките на асимилација кои биле спроведувани за време на комунистичката власт во Бугарија.
Во резолуцијата се посочува и дека Бугарија треба да биде повикана на поголема одговорност во однос на обврските што ги има како земја членка на Европската Унија во сферата на човековите и малцинските права.
Меѓу барањата се наведува Европската Унија да обрне поголемо внимание на состојбата со Македонците во Бугарија, да се стави крај на, како што се оценува, двојниот аршин во однос на третманот на малцинствата во земјите членки и кандидатите за членство, како и да се обезбеди политичка застапеност на Македонците во Националниот совет за соработка по етнички и интеграциски прашања во Бугарија.
Најзначајниот дел од иницијативата е барањето Бугарија официјално да се извини за, како што е наведено, злосторствата извршени врз македонското малцинство за време на комунистичките години. Во документот се споменуваат Македонци кои, според авторите, биле тепани, присилно преселувани, понижувани, казнувани, затворани и убивани поради изразување на својот етнички идентитет и спротивставување на политиките на денационализација.
Предлог-резолуцијата треба да биде разгледана во рамки на органите на Европската слободна алијанса. Доколку биде усвоена, таа ќе претставува политички став на организацијата, но нема обврзувачка правна сила врз институциите на Европската Унија или врз Бугарија.
