Советничката во Општина Центар, Диана Ристовска Додевски, денеска на прес-конференцијата упати критики до градоначалникот Горан Герасимовски и локалната власт, посочувајќи дека жителите на улицата „Охридска“ во Маџир Маало подолг период се соочуваат со сериозни проблеми поврзани со градежните активности во овој дел од општината.
Според Ристовска Додевски, состојбата на терен создава секојдневни потешкотии за жителите, кои, како што рече, се принудени да се движат низ прашина и градежен шут.
Таа посочи дека движењето по тротоарите е значително отежнато, особено за родители со детски колички, лица со попреченост и повозрасни граѓани, кои често мораат да се движат по коловозот заедно со возилата.
„Недозволиво е со години да не се реагира на проблемите со кои се соочуваат жителите на Маџир Маало. Граѓаните заслужуваат безбедна инфраструктура и нормални услови за живот“, истакна Ристовска Додевски.
Таа го повика градоначалникот Горан Герасимовски лично да ја посети локацијата и да даде одговори за тековните градежни активности, како и за мерките што ќе бидат преземени за надминување на проблемите.
Од ВМРО-ДПМНЕ бараат Општина Центар итно да преземе активности за расчистување на состојбата на терен и обезбедување безбедно движење за жителите на овој дел од општината.
