Компанијата Rockstar Games, преку својата матична компанија Take-Two Interactive, потврди нови детали поврзани со долгоочекуваната видеоигра GTA 6, вклучувајќи го и датумот кога ќе започнат преднарачките.
Според објавените информации, преднарачките за „Grand Theft Auto VI“ ќе бидат отворени на 25 јуни, што дополнително ги зајакнува очекувањата дека играта навистина ќе биде објавена на најавениот датум – 19 ноември.
Во изминатиот период имаше шпекулации за можни нови одложувања, но најавата за почеток на продажбата сугерира дека развојот на играта се одвива според планираната динамика. Дополнителен аргумент за тоа е фактот што Rockstar во минатото евентуалните одложувања ги соопштуваше неколку месеци однапред, а до официјалното излегување сега остануваат помалку од пет месеци.
GTA 6 важи за една од најочекуваните видеоигри во последната деценија, а нејзиното пристигнување предизвикува огромен интерес кај гејмерската заедница ширум светот.
Играта првично ќе биде достапна за конзолите PlayStation 5 и Xbox Series X/S, додека засега нема официјална потврда кога би можела да биде објавена и верзија за персонални компјутери.
Од Take-Two најавуваат дека во текот на летото ќе започне и засилена маркетиншка кампања, со нови информации и промотивни материјали поврзани со играта.
