Полемиките околу улогата на Кристијано Роналдо во португалската репрезентација добија ново продолжение по ремито против Конго (1:1) на Светското првенство и шпекулациите за наводно незадоволство во соблекувалната.
Дел од јавноста го критикуваше настапот на искусниот напаѓач, оценувајќи дека неговата игра е премногу индивидуална и недоволно вклопена во тимскиот систем на селекторот Роберто Мартинез.
Дополнително внимание привлече изјавата на играчот за врска Жоао Невеш, кој истакна дека во националниот тим кон Роналдо се однесуваат како кон секој друг фудбалер.
„Сите знаеме што направил за репрезентацијата, но во моментов и тој е само уште еден соиграч што треба да му помогне на тимот. Не е поразличен од останатите и ќе придонесува како и сите други“, изјави Невеш.
Неговите зборови предизвикаа бројни толкувања во медиумите и меѓу навивачите, кои ги поврзаа со можни нарушени односи во соблекувалната.
Набргу потоа, Роналдо се огласи на Инстаграм, објавувајќи фотографија од натпреварот со пораката: „Фокусирај се на она што можеш да го контролираш“.
Подоцна, португалскиот капитен објави и заедничка фотографија со соиграчите, придружена со кратката порака: „Секогаш обединети“, со што испрати сигнал дека тимот останува сплотен.
Во дебатата се вклучи и колумнистот на португалскиот весник „А Бола“, Нуно Сараива, кој оцени дека е време да се размислува за нова ера во португалскиот фудбал и за постепено повлекување на легендарниот напаѓач.
И покрај тоа што има 41 година, Роналдо и понатаму е една од најголемите ѕвезди на светскиот фудбал. Во својата кариера настапуваше за Спортинг Лисабон, Манчестер јунајтед, Реал Мадрид и Јувентус, а моментално го носи дресот на Ал Наср.
За репрезентацијата на Португалија има одиграно 229 натпревари, постигнато 143 голови и запишано 46 асистенции, што го прави еден од најефикасните фудбалери во историјата на националните селекции.
