Колективниот Запад предизвикува конфликти во различни региони, веќе го доведе Блискиот Исток на работ на целосна војна, а сега ја дестабилизира состојбата и на Балканот, изјави амбасадорот за специјални задачи на руското Министерство за надворешни работи, Александар Трофимов.
Во интервју за руската агенција ТАСС, дадено на маргините на експертскиот дијалог во рамки на Валдајскиот клуб, Трофимов оцени дека Западот дејствува исклучиво во сопствен интерес и „го разгорува пламенот на конфликтите“ низ Евроазија, додека земјите од Европската Унија и НАТО настојуваат европскиот континент да го претворат во простор на геополитичка конфронтација.
„Тие ја предизвикаа кризата во Источна Европа и Украина, го дестабилизираат Балканот и го доведоа Блискиот Исток на работ на целосна војна. Сите сме сведоци на трагичните настани што таму се одвиваат“, изјави Трофимов.
Тој додаде дека земјите од ЕУ и НАТО „намерно дестабилизираат“ повеќе региони на Евроазија, вклучително и Централна, Јужна, Североисточна и Југоисточна Азија, како и Арктикот, кој, според него, сè повеќе се милитаризира.
Според рускиот дипломат, ваквото дејствување е дел од поширока стратегија на Западот насочена кон „ограничување на алтернативните центри на моќ“.
Запрашан дали очекува антируските санкции да бидат укинати доколку дојде до нормализација на односите меѓу Русија и Западот, Трофимов рече дека не знае што точно се подразбира под „нормализација на односите“ и додаде дека се надева оти тоа не значи враќање на односите на нивото од времето на „нашите баби“.
