Русија и Украина повторно извршија размена на телата на загинатите војници, во рамки на договорите што и покрај војната повремено се спроведуваат меѓу двете земји.
Според украинските власти, Украина презела 522 тела на загинати, додека Русија добила 33 тела. Информацијата ја потврдија и руските државни новински агенции.
Од почетокот на 2025 година, Русија вратила повеќе од 20.000 посмртни останки на украински државјани, додека примила повеќе од 600 тела на свои загинати војници.
Размената се случува во услови на продолжени борби долж фронтот, каде што руските сили постепено напредуваат на одредени делови од територијата. Поради состојбата на теренот, украинската армија во многу случаи не е во можност веднаш да ги преземе телата на своите загинати војници.
И двете страни и натаму не објавуваат целосни официјални податоци за воените загуби. Според проценките, Украина има околу 190.000 загинати и исчезнати лица, додека руските загуби се проценуваат на повеќе од 350.000 луѓе.
Податоците на Обединетите нации покажуваат дека до мај годинава во војната загинале повеќе од 16.100 цивили.
Војната во Украина трае од февруари 2022 година, кога Русија ја започна својата целосна инвазија врз земјата.
